Jam dictus autem dux Oddo fecit aliam donationem Cluniacensi monasterio, quod videlicet ipse concedebat et laudabat, si quis suorum hominum de beneficiis que de illo habent velit dare Sancto Petro Cluniacensi, tali tenore ut de fidelitate et servitio suo non se subtraheret. Et hoc fecit rogatu donni Hugonis, fratris sui, jam tunc monachi, sed ante ipsum ducis. Cui donationi presentes et testes fuerunt: Wido de Grancie, Tiezelinus li Sor, Seguinus de Voldonai, Rainerius sescaldus. Qui etiam jam dicti interfuerunt et testes extiterunt donationi de potestate Montelie, que ego in proprios usus retinebam.